నర్సీపట్నం: ఆగష్టు12 ( స్పీడ్ న్యూస్ )
నర్సీపట్నం మున్సిపాలిటీలో అభివృద్ధి పనులు ముమ్మరంగా కొనసాగుతున్నాయి. పట్టణంలోని 21, 22, 23వ వార్డుల్లో నూతనంగా మంజూరైన సుమారు రూ.1.94 కోట్ల విలువైన అభివృద్ధి పనులకు రాష్ట్ర శాసనసభ స్పీకర్ చింతకాయల అయ్యన్నపాత్రుడు సతీమణి చింతకాయల పద్మావతి సోమవారం శ్రీకారం చుట్టారు. కొబ్బరికాయ కొట్టి పనులను ప్రారంభించడంతో పాటు శిలాఫలకాలను ఆవిష్కరించారు.
ఆయా వార్డుల్లో పర్యటించిన చింతకాయల పద్మావతికి స్థానిక ప్రజలు, మహిళలు హారతులు పట్టి ఘన స్వాగతం పలికారు. VMRDA, 15వ ఆర్థిక సంఘం, DMFT నిధులతో మూడు వార్డుల్లో సీసీ రోడ్లు, డ్రైనేజీలు, కల్వర్టుల నిర్మాణ పనులు చేపడుతున్నారు.
21వ వార్డులో రూ.34.62 లక్షలు, 22వ వార్డులో రూ.78.60 లక్షలు, 23వ వార్డులో రూ.80 లక్షల అంచనా వ్యయంతో మౌలిక వసతుల అభివృద్ధి పనులు చేపట్టారు. రోడ్లు, డ్రైనేజీలు, కల్వర్టుల నిర్మాణంతో ఆయా ప్రాంతాల్లో ప్రజలకు రాకపోకలు, పారిశుద్ధ్యం మరింత మెరుగుపడనున్నాయి.
15 రోజుల్లోనే 189 పనులు
ఈ సందర్భంగా చింతకాయల పద్మావతి మాట్లాడుతూ.. నర్సీపట్నం మున్సిపాలిటీలో గత పదిహేను రోజులుగా అభివృద్ధి పనుల ప్రారంభోత్సవాలు ముమ్మరంగా జరుగుతున్నాయని తెలిపారు. మొత్తం 189 రోడ్లు, కాలువల పనులను పూర్తి చేసి ప్రజలకు అందుబాటులోకి తీసుకువస్తున్నామని చెప్పారు.
గత ఐదేళ్ల పాలనలో నర్సీపట్నం మున్సిపాలిటీ అభివృద్ధికి ఒక్క రూపాయి కూడా కేటాయించలేదని ఆమె విమర్శించారు. కూటమి ప్రభుత్వం అధికారంలోకి వచ్చిన తర్వాత స్పీకర్ అయ్యన్నపాత్రుడు ప్రత్యేక చొరవతో మున్సిపాలిటీకి రూ.32 కోట్ల నిధులు మంజూరయ్యాయని తెలిపారు.
ప్రతి ఇంటికీ తాగునీటి కుళాయి
రానున్న ఏడాదిన్నర కాలంలో నర్సీపట్నం పట్టణంలోని ప్రతి ఇంటికీ తాగునీటి కుళాయి అందించాలన్న లక్ష్యంతో రూ.185 కోట్లతో ఇంటింటికీ కుళాయి కార్యక్రమాన్ని చేపట్టనున్నట్లు చింతకాయల పద్మావతి వెల్లడించారు. పట్టణ ప్రజలకు అవసరమైన మౌలిక సదుపాయాలను కల్పించడమే ప్రధాన లక్ష్యమని స్పష్టం చేశారు.
మున్సిపాలిటీలో ఏ వార్డులో సమస్య ఉన్నా పార్టీలకు అతీతంగా పరిష్కరించి అభివృద్ధి పనులు చేపడతామని హామీ ఇచ్చారు. ప్రజల శ్రేయస్సు కోసం నిరంతరం పనిచేసే నాయకులను ఎన్నుకోవడం వల్లే అభివృద్ధి సాధ్యమవుతుందని పేర్కొన్నారు.
అభివృద్ధి పనులకు నిధులు మంజూరు చేసిన ముఖ్యమంత్రి నారా చంద్రబాబు నాయుడికి, ప్రత్యేక చొరవ చూపిన శాసనసభ స్పీకర్ చింతకాయల అయ్యన్నపాత్రుడికి ఆమె కృతజ్ఞతలు తెలిపారు.
భారీగా పాల్గొన్న కూటమి శ్రేణులు
ఈ కార్యక్రమంలో వార్డు ఇన్‌ఛార్జులు, స్థానిక నాయకులు రాజకుమార్, రాజేష్, రాంబాబు, చింటూ, దివ్య, చంద్రిక, బాప్జీ, రమేష్, నాగరాజు, ప్రసాద్, తాతబాబు, భద్రర్రావు, లక్ష్మి తదితరులు పాల్గొన్నారు. 28 వార్డుల ఇన్‌ఛార్జులు, టీడీపీ–జనసేన–బీజేపీ కూటమి నాయకులు, కార్యకర్తలు, స్థానిక ప్రజలు, మహిళలు పెద్ద సంఖ్యలో హాజరయ్యారు.
నర్సీపట్నం పట్టణంలో రోడ్లు, డ్రైనేజీలు, తాగునీరు వంటి మౌలిక సదుపాయాలపై వరుసగా పనులు చేపడుతుండటంతో ప్రజలు హర్షం వ్యక్తం చేశారు.