అనకాపల్లి జిల్లా, నర్సీపట్నం, ఆగస్టు 6 (స్పీడ్ న్యూస్):
నర్సీపట్నం నియోజకవర్గంలోని నాతవరం మండలంలో వైఎస్సార్ కాంగ్రెస్ పార్టీ ఆధ్వర్యంలో రిలే నిరాహార దీక్షలు నిర్వహించారు. ఈ కార్యక్రమంలో మాజీ ఎమ్మెల్యే పెట్ల ఉమాశంకర్ గణేష్, జిల్లా అధ్యక్షుడు బొడ్డెట ప్రసాద్తో పాటు మండల నాయకులు, పార్టీ కార్యకర్తలు పాల్గొన్నారు.
ఈ సందర్భంగా జిల్లా అధ్యక్షుడు బొడ్డెట ప్రసాద్ మాట్లాడుతూ, రాష్ట్ర ప్రభుత్వం విద్యార్థులకు పెండింగ్‌లో ఉన్న ఫీజు రీయింబర్స్‌మెంట్ బకాయిలను వెంటనే విడుదల చేయాలని డిమాండ్ చేశారు. నిరుద్యోగ యువతకు ఎన్నికల సమయంలో ఇచ్చిన హామీ మేరకు నిరుద్యోగ భృతిని వెంటనే అమలు చేయాలని కోరారు. విద్యార్థులు, నిరుద్యోగుల సమస్యలను ప్రభుత్వం నిర్లక్ష్యం చేస్తోందని ఆయన విమర్శించారు.
డీఎస్సీ పరీక్ష పేపర్ లీకేజ్ ఘటనపై నైతిక బాధ్యత వహిస్తూ మంత్రి నారా లోకేష్ రాజీనామా చేయాలని ఆయన డిమాండ్ చేశారు. విద్యా వ్యవస్థపై ప్రజల్లో విశ్వాసం దెబ్బతినేలా జరిగిన ఈ ఘటనపై ప్రభుత్వం సమగ్ర విచారణ చేపట్టి బాధ్యులపై కఠిన చర్యలు తీసుకోవాలని కోరారు.
మాజీ ఎమ్మెల్యే పెట్ల ఉమాశంకర్ గణేష్ మాట్లాడుతూ, ప్రజా సమస్యల పరిష్కారం కోసం వైఎస్సార్ కాంగ్రెస్ పార్టీ ఎప్పుడూ ముందుంటుందని అన్నారు. ఫీజు రీయింబర్స్‌మెంట్ బకాయిల విడుదల, నిరుద్యోగ భృతి అమలు, విద్యార్థులు మరియు నిరుద్యోగుల సమస్యల పరిష్కారం జరిగే వరకు ప్రభుత్వంపై తమ పోరాటం కొనసాగుతుందని స్పష్టం చేశారు. ప్రజలకు ఇచ్చిన హామీలను ప్రభుత్వం నెరవేర్చే వరకు ఉద్యమాలు మరింత ఉధృతం చేస్తామని హెచ్చరించారు.
ఈ రిలే నిరాహార దీక్షల్లో మండల పార్టీ అధ్యక్షుడు లగుడు నాగేశ్వరరావు, ఎంపీపీ లక్ష్మణమూర్తి, జడ్పీటీసీ కపరపు అప్పలనరస, పైలా సునీల్, కరక రాజు తదితర పార్టీ నాయకులు, కార్యకర్తలు పెద్ద సంఖ్యలో పాల్గొని ప్రభుత్వానికి వ్యతిరేకంగా నినాదాలు చేశారు.