నర్సీపట్నం, జూలై 22: ( స్పీడ్ న్యూస్)
నర్సీపట్నం నియోజకవర్గ చరిత్రలో మరో కీలక మైలురాయిగా నిలిచే భారీ తాగునీటి ప్రాజెక్టుకు రాష్ట్ర ప్రభుత్వం పరిపాలనా అనుమతులు మంజూరు చేసింది. దాదాపు రూ.500 కోట్ల అంచనా వ్యయంతో ప్రతి ఇంటికి స్వచ్ఛమైన తాగునీటిని అందించేందుకు రూపొందించిన ఈ బృహత్తర ప్రాజెక్టుకు ప్రభుత్వం జి.ఓ.ఎంఎస్. నంబర్–93 జారీ చేసింది. ఈ నిర్ణయం నర్సీపట్నం ప్రజల చిరకాల తాగునీటి సమస్యకు శాశ్వత పరిష్కారం దిశగా కీలక అడుగుగా భావిస్తున్నారు.
ఈ సందర్భంగా బుధవారం నిర్వహించిన విలేకరుల సమావేశంలో అసెంబ్లీ స్పీకర్ చింతకాయల అయ్యన్నపాత్రుడు మాట్లాడుతూ, నర్సీపట్నం నియోజకవర్గ ప్రజల సంక్షేమమే తన ప్రధాన లక్ష్యమని, ఎన్నో ఏళ్లుగా ప్రజలు ఎదుర్కొంటున్న తాగునీటి సమస్యను శాశ్వతంగా పరిష్కరించాలనే సంకల్పంతో ప్రభుత్వ దృష్టికి ఈ ప్రతిపాదనను తీసుకెళ్లినట్లు తెలిపారు. తన నిరంతర కృషి, ప్రభుత్వ సానుకూల స్పందనతో ఈ భారీ ప్రాజెక్టు ఆమోదం పొందడం ఎంతో ఆనందంగా ఉందన్నారు.
కేంద్ర ప్రభుత్వం అమలు చేస్తున్న జల్ జీవన్ మిషన్ మార్గదర్శకాలకు అనుగుణంగా ఈ ప్రాజెక్టును చేపడుతున్నామని, నిర్ణయించిన కార్యాచరణ ప్రకారం జూన్–2028 నాటికి పనులు పూర్తిచేసి ప్రతి ఇంటికి నాణ్యమైన తాగునీటిని అందించేందుకు ప్రభుత్వం లక్ష్యంగా పెట్టుకుందని ఆయన వెల్లడించారు. పనుల అమలులో నాణ్యతకు అత్యంత ప్రాధాన్యం ఇవ్వాలని, ఎలాంటి జాప్యం లేకుండా వేగవంతంగా పూర్తి చేయాలని సంబంధిత అధికారులకు ప్రభుత్వం స్పష్టమైన ఆదేశాలు జారీ చేసిందని చెప్పారు.
ఈ ప్రాజెక్టు పూర్తయిన తర్వాత నర్సీపట్నం నియోజకవర్గంలోని పట్టణ, గ్రామీణ ప్రాంతాల్లో తాగునీటి కొరత గణనీయంగా తగ్గడంతో పాటు వేలాది కుటుంబాలకు స్వచ్ఛమైన తాగునీరు అందుబాటులోకి రానుందని స్పీకర్ పేర్కొన్నారు. ప్రజల ఆరోగ్య పరిరక్షణ, మెరుగైన జీవన ప్రమాణాల కోసం ఈ ప్రాజెక్టు ఎంతో ఉపయోగపడుతుందని తెలిపారు.
నియోజకవర్గ ప్రజల ఆకాంక్షను నెరవేర్చడంలో సహకరించిన ముఖ్యమంత్రి నారా చంద్రబాబునాయుడు, ఉప ముఖ్యమంత్రి పవన్ కళ్యాణ్, మంత్రివర్యులు నారా లోకేష్లకు నియోజకవర్గ ప్రజల తరఫున స్పీకర్ చింతకాయల అయ్యన్నపాత్రుడు ప్రత్యేక కృతజ్ఞతలు తెలిపారు. రాష్ట్ర ప్రభుత్వం ప్రజా సంక్షేమానికి పెద్దపీట వేస్తూ అభివృద్ధి కార్యక్రమాలను వేగవంతంగా అమలు చేస్తోందని ఆయన అన్నారు.
ఈ జీవో జారీతో నర్సీపట్నం నియోజకవర్గ అభివృద్ధి చరిత్రలో కొత్త అధ్యాయం ప్రారంభమైనట్లేనని స్థానిక ప్రజలు హర్షం వ్యక్తం చేస్తున్నారు. రూ.500 కోట్లతో చేపట్టనున్న ఈ బృహత్తర తాగునీటి ప్రాజెక్టు పూర్తయితే, భవిష్యత్ తరాలకు సైతం తాగునీటి సమస్య లేకుండా ఉండేలా శాశ్వత పరిష్కారం లభిస్తుందని ఆశాభావం వ్యక్తమవుతోంది.